Waarskuwing: Langtermyn Gebruik van Protonpomp-inhibitore (PPIs)

Die langtermyn gebruik van protonpomp-inhibitore (PPIs), ‘n medikasie teen sooibrand, is baie algemeen en mense drink dit soms jare lank as chroniese medikasie.  Hierdie pille (handelsname sluit in Altosec, Losec, Nexium, Omez en vele meer) is baie effektief.  Dit skakel in die meeste gevalle sooibrand uit deurdat dit die vorming van maagsuur belemmer deur die maag se protonpomp te blokkeer, vandaar die naam. (Suur word in die pariëtale selle in die maagslymvlies gevorm, en word dan fisiologies “uitgepomp” na die binnekant van die maag).

Normaalweg skei die selle in die maagwand sterk suur af sodat die suurgraad van die maag ‘n pH van 1 het  (die laagste grens van suur meting in die natuur)  Hierdie maagsuur speel ‘n belangrike rol in die vertering van kos en vernietig ook die kieme in die kos wat ons eet.

Wanneer hierdie belangrike fisiologiese meganisme geblokkeer of beskadig word, kan dit verskeie newe-effekte veroorsaak:

• Die kos in die maag en dunderm word nie meer gesteriliseer nie. Met normale suurvlakke in ons maagsuur kan ons letterlik ‘n glas vol bakterieë drink sonder om daarvan siek te word. Wanneer mense reis en op ander plekke eet, is hulle meer vatbaar vir gastroënteritis met braking en diaree. Wanneer iemand PPIs gebruik is die persoon ook meer vatbaar vir sulke siektes.  Een van die gevaarlikste soorte diaree word veroorsaak deur Clostridium difficile (C. diff) wat baie moeilik is om te behandel en die dood kan veroorsaak.
• Langdurige gebruik veroorsaak gastriese atrofie: die slymvlies van die maag word dun en oneffektief.
• Gastriese atrofie kan lei tot wanabsorpsie, met ander woorde gebrekkige absorpsie van voedingstowwe uit die dermkanaal. Kalsium en magnesium, asook yster en vitamien B 12 wat nodig is vir die vorming van rooibloedselle en brein (senuwee)- weefsel is veral hier ter sprake.
• Dit verander die mikrobioom in die dermkanaal. Die mikrobioom speel ‘n rol in ons weerstand teen siektes, die absorpsie van voedingstowwe, gewigstoename (!) en vervetting van die lewer.  Tekorte van hierdie belangrike minerale veroorsaak verskeie siektetoestande.
• Te min kalsium (weens wanabsorpsie van die dermkanaal na langdurige PPI gebruik) veroorsaak onder andere osteoporose met die verhoogde risiko van frakture –  ons sien dikwels werwelkollaps en heupfrakture.
• Die uitruiling van kalsium en magnesium oor die selmembrane van al ons organe is die sleutel tot verskeie metaboliese prosesse in die liggaam, waaronder die vorming van been en ‘n sterk skelet, die gesondheid en krag van al ons spiere en vele meer. Te min magnesium kan erge spierkrampe veroorsaak (en onthou die hart en die diafragma is ook spiere). Magnesium is verder belangrik in die absorpsie van sommige medisynes, waaronder Digoksien wat vir hartversaking voorgeskryf word.

PPIs is nou in Suid-Afrika beskikbaar vir ongeveer 30 jaar, en op hierdie stadium word al meer bekend oor die langtermyngevolge van chroniese gebruik daarvan.  Navorsing dui op beskadiging van die niere met verlaagde nierfunksie (deurdat die buise van Henley beskadig word), vinniger veroudering van die vel, en ‘n verhoogde insidensie van longinfeksies.

‘n Ontstellende bevinding is dat dit ‘n rol kan speel in die ontstaan van Alzheimer se siekte.  Heelwat navorsing word tans daaroor gedoen.  Die verduideliking is die volgende: die sogenaamde protonpomp kom nie net in die maag voor nie, maar ook in ander organe, waaronder die brein.  As ‘n mens ‘n protonpomp-inhibitor drink, beïnvloed dit dus nie net die maagslymvlies nie, maar ook die brein.  Die suurgraad in die brein is belangrik om die neerlegging van ‘n substans wat ons amiloïed noem te verhoed.  In die brein van mense met Alzheimer se siekte is die teenwoordigheid van amiloïed opvallend, terwyl daar geen in ‘n normale brein teenwoordig is nie.

Wat is dan die rol en die waarde van die PPIs?  Hierdie medisyne het die behandeling van maagsere (peptiese ulkus) gerevolusioniseer.  ‘n Bloeiende maagseer kan die dood veroorsaak, en vroeër jare is gedeeltes van die maag chirurgies uitgesny (gedeeltelike gastrektomie).  Die Vagus-senuwee, wat ‘n rol speel in die afskeiding van maagsuur, is afgesny.  Hierdie operasies het langtermyn baie nadelige newe-effekte gehad en hierdie pasiënte het nooit weer ‘n normale lewe gehad nie. Met ‘n binne-aarse PPI kan hierdie bloeding letterlik binne minute gestop word en die ulkus sal heeltemal herstel.

PPIs is nuttig om erge sooibrand heeltemal te stop.  Sooibrand gaan gepaard met refluks (die opstoot van maaginhoud in die slukderm), en die suur brand dan die sensitiewe slymvlies van die slukderm.  PPIs verhoed nie refluks nie, dit gebeur nog steeds, maar aangesien daar minder suur in is brand dit nie die slukderm nie.

Wêreldwyd word nou aanbeveel dat PPIs slegs vir kort tydperke gebruik word. Dis bekend dat mense afhanklik word aan die effek daarvan.  Eksperimenteel is bevind dat as mense wat nog nooit sooibrand gehad het nie vir ‘n maand lank ‘n PPI drink, hulle daarna sooibrand kry as hulle dit staak.

Waarheen dan nou met sooibrand? Sooibrand is dikwels die ligaam se manier om protes aan te teken teen verkeerde eetgewoontes, verkeerde lewenstyl, rook en dies meer.  Om die sooibrand af te skakel is om die boodskappertjie dood te slaan.

Hanteer dus sooibrand logies deur die oorsake uit te skakel.  Mense weet dikwels wat hulle sooibrand veroorsaak.  Vermy daardie kosse en vloeistowwe!  Die wye gebruik van gaskoeldrank en gasbevattende drankies het die voorkoms van sooibrand baie verhoog.  Dit is tog ‘n eienaardige gewoonte om iets te drink wat so vol gas is dat jy dit dadelik boontoe moet uitforseer deur te “burp”.  Jy forseer die sfinkterspier wat die ondereinde van die slukderm dig toe hou (en die maagsuur binne) oop en met verloop van tyd sal dit verslap.  Dis boonop ‘n onaantreklike geluid en sosiaal onaanvaarbaar.

Indien jy oorgewig is, help gewigsverlies om sooibrand te verminder.  Die teenwoordigheid van baie buikvet veroorsaak groot opwaartse drukking op die diafragma, wat bydra tot sooibrand.

Ons het 20 jaar gelede navorsing gedoen op mense wat vir ‘n jaar lank ‘n PPI gedrink het.  Feitlik almal het gewig opgetel.  Een man het gesê: vantevore het ek verskriklik sooibrand gekry as ek selfs net een koeksister eet; nou kan ek ‘n hele bak vol opeet!  En hy het!  In die proses het hy 30 kg swaarder geword.

Suiker en soetgoed, kaffeïene, sterk speserye, brood en vetterige kos is moontlike oorsake van sooibrand.  Skakel uit wat jou affekteer. Gebruik anti-suur middels soos Gaviscon of Rennies wat net lokaal in die maag werk en nie die fisiologie van spysvertering beïnvloed nie.

Indien jy wel ‘n PPI nodig het, gebruik dit vir ‘n maksimum van 2 maande.  Of drink net af en toe enetjie wanneer jy nie anders kan nie, maar moet dit nie elke dag as chroniese medisyne neem nie.

Sien ook die artikel Waarheen dan met PPIs (protonpomp-inhibitore)? wat as opvolg tot hierdie artikel geskryf is.